Cronica dil Chor mischedau Schluein
La fundaziun dil Chor mischedau Schluein ha gia liug ils 17 d'avrel 1967. Sut l'initiativa da dirigent Gion Cavelty han 30 convischinas e convischins da Schluein ughegiau quei pass. Els han propi schau nescher aschia il Chor da sutensi. Mirond cun bien aspect el futur, ei il chor vegnius fundaus sut il motto: "Il Chor mischedau Schluein duei cultivar il cant profan ed intender il spért da cuminonza el vitg".
Empremas elecziuns:
Sco emprem president dil chor vegn il grond iniziant dil chor Gieri Gambon elegius. El ha surpriu igl uffeci pér suenter ditg haregiar e grad nomminau sez tgi che duei seser en suprastonza.
Cheutras elegia la radunonza la suandonta suprastonza:
- Gieri Gambon president
- Anton Pelican vice-president
- Dora Cavelty cassiera
- Plazi Cajochen actuar
- Gion Cavelty dirigent
Daco ei il chor vegnius fundaus?
Ei existeva a Schluein il chor viril che cantava era en baselgia. Quei chor haveva grondas breigias da semantener pervia dil pign diember da cantadurs (15 - 20 commembers). Tier exercezis eis ei per part mo 2 - 3 cantadurs en enqualla vusch. Per cantar messa stuev'ins meinsvart clamar e rugar neutier certs cantadurs per saver cantar. Che quei saveva buca ir aschia vinavon era capeivel. Aschia han ins priu en vesta da semetter ensemmen cun cantar en fuorma da chor mischedau ad hoc. Biars cantadurs dil chor viril cantavan en omisdus chors. Ils exercezis dil chor mischedau vegneva fatgs en stanza da scola pintga, ferton ch'il chor viril fagieva els en stanza da scola gronda. Il chor mischedau saveva denton era far diever mo d'in harmonium vegl.
Impuls tier la fundaziun:
Igl onn 1966, pia in onn avon la fundaziun, ha nies convischin pader Pieder Paul Peng giu cheu a Schluein messa nuviala. Quei di ei il chor sepassaus si l'emprema gada cun entginas canzuns. La presentaziun ei stada gartegiada en uorden. Las emprovas da cant mavan detg stupen. Perfin cun star en cumpignia vegnev'ei cantau entginas canzuns, schegie che leu era il chor buca grad ferms. Nies dirigent Gion Cavelty teneva lu era empau anavos il chor da cantar en ustrias cun perschuasiun ch'ins lavaghi lu l'exatadad da cantar. Nies dirigent deva gia lu tiel cant pli bia peisa ad in cant serius che ad in cant hilaric. Il chor era denton buca diltut da quei meini. Sco chor ad hoc vegnev'ei era cantau la sera familiara en casa da scola veglia. Menziunar astg'ins era che l'uniun sporitva haveva denter 1958 - ca. 1960 in chor ad hoc, gl'emprem sut la bitgetta da scolast Giacun Steiner da Surmir, e lu continuau cun scolast Sep Tschuor da Sagogn. Quels exercezis havevan lu adina liug la dumengia suenter messa. Era quei chor ha contribuiu vid la cultivaziun dallas vuschs dils giuvens da Schluein. In garnin da lu ha segiramein era pigliau enzanua ina ragischetta.
Ei mass memia lunsch da menziunar tuttas activitads ed engaschaments en 25 onns. Enzaconts eveniments:
1968 Il dirigent Gion Cavelty sedistachescha da tutta influenza visavis autras uniuns ed autoritads en vischnaunca concernent la fundaziun del chor.
1969 Il chor concluda da menar atras ina fiasta en tenda ensemmen cun la societad da tir "Tell" Schluein.
1970 priu part alla fiasta da cant districtuala a Surrein.
1971 il chor embellescha la fiasta a caschun dall'elecziun da convischin dr. Luregn Mathias Cavelty sco niev eligiu cusseglier naziunal.
1975 partizipaziun alla fiasta da cant sursilvana a Lumbrein.
1976 la casa da scola vegn inaugurada ed il chor sepresenta cun entginas canzuns.
1979 fiasta da cant districtuala a Sumvitg/Cumpadials, nua ch'il chor pren part cun la canzun "Il viandont".
1979 ha il chor emprius ina messa nova e cantau da Nadal en baselgia. Quei ei stau l'entschatta ch'il chor ha cantau en baselgia. Naven da lu embellescha il chor tut las fiastas ecclesiaticas.
1980 participaziun alla fiasta da cant a Mustér.
1981 Cantau tier la reavertura ed inauguraziun dalla baselgia.
1984 priu part alla fiasta da cant districtuala a Laax e ...
1988 ... a Breil.
1989 il Chor fa part alla fiasta dil niev eligiu mistral dalla Foppa, il concantadur Placi Cajochen.
Plinavon ha il chor arranschau concerts a Schluein e collaborau ensemen cun auters Chors.
Era per il radio han ei priu si entginas bialas canzuns, las qualas ins sa adina puspei tedlar al Radio romontsch.